26 mei: Zummeraomnd in ’t veurjaor.

Gistermiddag was het rond 16.00 uur nog arg warm; wij leupen nog eem naor de markt, kochten wat fruit en geneuten van een ijssie op een terrassie.
Nao  19.00 uur koelde het lekker of en besleuten we nog even een rondtie te fietsen.
Wij realiseert oons tiedens zu’n fietstocht hoe prachtig het hier in de kop van Drenthe is. Dunderdagmörgen kopte het Dagblad van het Noorden al: “Het leven is bijna een 8 in Drenthe. Noord Drenthe kent hoogste brede welvaart van Nederland.”

Toen FC Emmen ofgelopen weekend promoveerde naor de eredivisie heurde ik het eerste laatdunkende randstedelijke commentaar al weer over Drenthe. Inmiddels kan ik daorover  mien scholders ophalen. Mien va kun dan zo tactvol opmarken: “Ik heb liever dat hij  het zeg as iene met zien volle verstaand”.
Ok Daniel Lohues is d’r hiel duudelijk over: “Maak maor niet te veul reclame veur de schoonheid en de rust van Drenthe; straks komt ze allemaol nog hierhen.”

In de rust van de zummerse veurjaorsaomnd fietsten wij over een bruggie het Lieverense Diepje over,  langs weilanden met pasgemaaid grös en jong vee: veulens,  kalver en laomer. In Foxwolde piepten twee puber-ooievaarties  over de raand van het nöst.
Wij bleem eem staon, maakten wat foto’s en waren het roerend iens: wat een mooie wereld.

Bij de rotonde richting Leek toeterde een auto hiel hard; toen we under het tunneltie deur waren fietst ree de auto toeterend naost oons.  Ik zwaaide enthousiast maor had gien idee wie het waren. Gerard wel; die maakte al koffie-drink-gebaren richting de lawaaipapagaaien. Eem later zaten we met onze vrienden uut Bovensmilde an de koffie op Waninge-plaza.
Het leven  is goed op het Drentse land.
Zeker wel een dikke acht.
En Drenthe zit qua voetbal nou eindelijk in de eredivisie, maor wij woont hier netuurlijk al jaoren in de eredivisie van Nederland!
Niet wieder vertellen……

Dit bericht is geplaatst in Streektaol. Bookmark de permalink.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Type de getallen in cijfers in onderstaand vak * Time limit is exhausted. Please reload the CAPTCHA.