9 november: Zinnig, een nei Drents tiedschrift.

Zaoterdag lag d’r een nei tiedschrift in mien brievenbus. “Zinnig” is de titel.
In de colofon stiet: Zinnig is een uutgave van het Huus van de Taol/Het Drentse Boek en verschient zes keer in ’t jaor. Zinnig is hét tiedschrift veur iederiene die wat hef met Drenthe, Drenten én de streektaol.

Veur mij dus, dat is wal dudelijk.
Het komp in de plek van twee aandere tiedschriften: Maandewark/Oeze volk en De Taolkrant.
Maandagmorgen bin ik d’r ies uutgebreid veur gaon zitten. Wat stiet d’r in?
– Een dubbel-interview met Hennie Kuijer en Leonie van der Werf, de vertrekkende en neie prissentratrice van Hemmeltied bij RTV Drenthe.
– Een colomn van een Drentse die in Noord-Amerika woont.
– Het woord ‘hemmeln’ wordt bespreuken deur Abel Darwinkel.
– Gedichten en körte verhalen (ze nuumt het poëzie en proza)
– Een column van Tieme Woldman over muziek/theater etc.
– Een recept veur een runderstoof met eerappelpuree
– Een puzzeltie, een stripverhaaltie en de rubriek “Van wel bin ie d’r iene?”

Ien van de mooiste dingen vun ik de column van Martije, die hielemaol niet goed wordt van al die buut’nlaandse woorden in oonze taol en van die hippe letters die a’j tegenwoordig in huus zetten kunt.
H O M E  en zo.
Zij koch hiel recalcitrant de letters h.o.e.t.s. en zet die groot veur ’t raam.
T H O E S.
“Want ik ben thoes, verdikke, niet home.” schref ze.
Gniezend lees ik zun verhaal, want o, wat bin ik het met heur iens…..

Wat ik nou ik huus kregen heb is het zogenaamde ‘nulde’ nummer van Zinnig.
In meert 2017 komp het eerste officiële nummer uut.
Bi’j ok beneid? Ie kunt een gratis exemplaar 0phalen bij het Huus van de Taol in Beilen.
Op de website van het Huus van de Taol >>> ku’j het blad ok digitaal bekieken en lees ie meer informatie over abonnementen enzo.

Mooi blad. Net wat veur mij. En veur iederiene die net as ik ‘wat hef met Drenthe, Drenten en de streektaol‘. Ik neem alvast een abonnement.