Dizze maond kwam der een neie Zinnig (Drents tiedschrift) uut.
Het thema was ‘Nei’ en ik haar een verhaal instuurd met as titel: “Een neie bezzum” met in mien achterheufd het spreekwoord ‘Neie bezzums veegt schoon’.
Die neie bezzum in mien verhaal was Karel Stegeman, de dirigent/cantor van oonze cantorij.
As lezer van mien blog he’j in de loop van de jaoren al best veul over hum kunnen lezen.
Bijveurbeeld over hoe hij veur het eerst veur oons koor stun tiedens een ‘proefdirectie’* in oktober 2019, hoe hij slaagde as dirigent in 2023 en hoe zich ‘versleu’ in 2o24.
En nog veul meer netuurlijk. maor dat kan ik hier allemaole niet benumen.
A’j met de zoekfunctie van dizze website ‘Karel’ intypt he’j nog mooi wat blogs te lezen…..
Van stukkies uut al die blogs over oonze cantor haar ik een verhaal schreven en instuurd naor de redactie van de Zinnig.
In september kreeg ik bericht dat mien verhaal uutkeuzen was veur publicatie en daor was ik wies met.
In die Zinnig-tekst heb ik Karel een aandere naam geven, de neie dirigent van het koor in het verhaol het Simon.
Het dorp Roden wordt ok niet neumd, dus het kan zich overal in Drenthe ofspeuld hebben.
Bij de Zinnig zörgt ze ok altied veur een mooie ofbielding bij de tekst en dizze keer was het een kleine tekening van een kuukentie met een dirigeerstok.
Dat haar ik namelijk schreven:
Een kuken, mèensen! Met mien negenvieftig lentes was ik destied ien van de jongsten op het koor. Dizze Simon was nog gien dartig. Jonger as oonze jongste dochter.
“Wat ’n jonge vent ja nog! Nou, ’t zal mie nei doun!’”
Op de 2e repetitie van de cantorij much ik ‘Een nei bezzum’ veurlezen en het zörgde veur veul herkenning en veul plezier.
As ik op dizze website wat schrief over Karel, dan stuur ik dat altied naor hum toe.
Hij reageert altied positief en gef daorbij ok an dat het veur hum mooi is um te lezen hoe zien wark ‘van de aandere kaante’ wordt ervaren in het koor.
A’j oonze cantorij allent kent van die keren dat wij metwarkt an een karkdienst, dan zie’j een groep oldere gemienteleden die serieus heur best staot te doen.
Deur mien verhaolen over de repetities ko’j der achter dat het ok gewoon een gezellige groep is die van samen zingen holt. Die plezier hebt met mekaar en die soms hard moet warken, want het komp oons beslist niet anweien. Karel haalt alles der uut wat der inzit en dat zörgt der veur dat der genog uutdaging is.
Nou bi’j netuurlijk beneid naor het verhaol!
Daor heb ik een PDF van maakt: klik hier um het te lezen.
* de proefdirectie – 2 oktober 2019
* slaagd als dirigent – 23 mei 2023
* Ik versla me – 23 april 2024











