Half oktober veul de neie ‘Zinnig’ op de mat.
Daor mag ik as streektaolschriever ok teksten naor toe sturen en zo nou en dan wordt d’r een verhaal van mien haand plaotst.
Dizze ‘Zinnig’ haar as underwarp Wonen.
Daor wus ik zo niks over; gien inspiratie.
Twee dagen veur de uuterste inleverdaotum vreug ik Gerard waor hij an dacht bij wonen.
Nao die autorit wus ik waor ik over zul schrieven.

Deure dichte!

Zomaor een maondagaomnd in juli; wij kiekt naor ‘de slimste mens’.
Kandidaot Zohair vertelt dat e iedere dag begunt met het opschrieven van dinge waor e dankbaor veur  is.
Ik stel mij veur dat ik s mörgens bij taovel zit met een brieffie.
Wat zul ik daor dan opschrieven?

As ik daor eem goed over naodenk zol ik an een hiel schriefblok nog niet genog hebben.
Anno 2021 is d’r zoveul um dankbaar veur te wezen.
Daarbij denk ik eem terugge  an een gesprek dat ik lest  in de auto haar met Gerard,  met wie ik al meer dan vittig jaor verkering heb.
Hij haalde herinnerings op an het sanitair vrogger bij hum thuus: een boerderijgie an de Gowenbrogge.
“Wij hadden toen nog gien wc met stromend water, maor een holten huusie met een tunnegie. De inhold gung nou en dan over de tuun.”
Ok vertelde hij over de tobbe waor hij met zien breurties in wast weur. Later kwam d’r een lavet op de deel waor ze in können douchen,  waor een plastic douchegedien umhen zat.
Het kost niet veul inbieldingsvermogen um te bedenken wat d’r gebeurde as de buutendeure lösgung. Veural in de winter.
“DEURE DICHTE! ” schrowde dan iene vanachter het gedien, die de kolle wind over de rugge kreeg.

Wij hebt het over vieftig jaor leden.
Oonze (groot) olders waren wies met heur lavet en heur moderne wc met een störtbak met een kettentie en een holten handvat.
“Dit kan toch absoluut niet meer…!” heurde ik een nuffige gast over zu’n authentieke wc zeggen in een commentaar op een Bed & Breakfast.

Verwende sikken bint wij in 2021.
Met oonze verwarmde wc’s en badkamers met warm stromend water.
Wij huuft lang zo hard niet meer te warken as de generaoties veur oons.
Wij bevindt oons in de luxe positie dat wij ’s mörgens an ’t ontbijt veur een brieffie kunt zitten en oons ofvraogen waor wij dankbaor veur bint.