Met de uutkomsten van de aomnd ‘Streektaal in de kerk’ (zie Stront en regenwater) zol de vesper van 10 april veurbereid worden.
Wij keuzen veur het thema ‘Gods liefde hef gien einde en gien grenzen’.
Het leek mij een goed idee um bij die vesper een koor uut te neudigen, maor een koor dat in de streektaol zingt was zo niet veurhanden.
Maor gelukkig: ik heb een ‘Af&Toe-koor-kaortenbak’; daor zit digitaal de namen in van gemienteleden die zo nou en dan wel ies met wilt zingen in een karkdienst of zo. De iene keer vormt wij een Christmascarols-koor, een andere keer een gelegenheidkoor in een ‘Ik zie joe’-viering.
De hiele kaortenbak kreeg van mij een mail met een uutneudiging om met te zingen in het ‘Nedersaksisch Af&Toe-koor’.
16 deelnemers kreeg ik maor liefst!
Gusteraomnd kwamen wij veur het eerst bij mekaar um te oefenen. Altied weer spannend.
Wat heb ik veur zangers? Is de stemverdieling een beetie goed? Het koor zal de gemientezang understeunen, maar zal ok een paar liedties allent zingen.
Het was veur mij gusteraomnd al weer genieten. Um het ‘Af&Toe-koor’ hangt altied een beetie de sfeer van de rebellenclub van Sjors en Sjimmie: Piety wet veul van meziek en helpt mij met akkoorden en moeilijke noten, Jelle hef een computerprogramma waormet e noten en tekst under mekaar kan zetten én oefenbestandties kan maken en Gerard stiet coachend op de tenorenrij en komt, net as Piety, met goeie adviezen.
Kippenvel kreeg ik bij de Nedersaksische versie van het Taizélied ‘Laudate omnes gentes’. Vierstemmig zungen we de vertaling die wij in febrewaori met de warkgroep maakt hadden. Wat biezunder!
Wij warkten een uur hiel hard. Het zul um half negen oflopen wezen en wij zollen geen koffie doen. Toen ik um 20.40 uur de repetitie ofsleut zee de koster bij wieze van verrassing : “Ik heb toch eem koffie, jongens!” Bonuspunten veur koster Gerard.
Eigenlijk bin ik nog niet hielemaol de oale nao de griep van veurige weke en eigenlijk was ik wel bek-of nao de repetitie. Maor wat heb ik hier een wille an! Wat is dit een mooi stukkie gemientewark waor ik mien hart an ophaal. Samen zingen, samen genieten van wat a’j an het doen bint veur een vesper in april. En dat allemaol in oons eigen Nedersaksisch dat in verschillende varianten veurbij komt: Grunnings, Twents en Drents.
Ko’j ok kieken en luusteren op 10 april? De vesper wordt hollen in Op de Helte en begunt um 19.00 uur.
En ok dan zörgt koster Gerard veur koffie nao de tied.
Welkom!
Willem
‘k heb nog nooit een karkdienst in het Drèents of een aandere Nedersaksische streektaol metmaakt, maor het lek mij wal een belevenis toe.
Achterof zat ik der een jaor of 15 nog het dichtst bij toen ‘k een keer metan dee an het Drèents dictee bij RTV-Drenthe. Ik verleur oeteindelijk van Jenny Lambers-Niers en die naam kwam ik later op de webstee van het Huus van de Taol regelmaotig integen as veurganger in een Drèentstaolige karkdienst, net as heur collega Hans Katerberg.
Maor ik kan je nou al zeggen da’k niet hen Roden kom; mij te wied vort. Een kennis van mij oet Hooghaolen giet rustig um 4 uur ’s mörgens op pad hen een kark argens in Oost-Friesland umdat der zo’n mooi örgel stiet. Dat zu’k niet opbrengen kunnen.
Boeten dat, op 10 april is ok mien jongste zus jaorig, al is de kaans groot daw die verjaordag combineert, want binnen 10 dagen biw met 4 breurs en zussen jaorig en wij holdt die verjaordagen, as het even kan, dan ok samen.
Maor hoe het ok is, ik weins je veul wil bij de Drèentstaolige dienst, of zoas ze in de toch vrij Rooms-Katholieke Liemers altied zegt: “Veul devotie”