Véurige weke schreef ik over ien weke niet mopperen. 
In het Drents hebt wij een mooi woord daorveur: ‘graanzen’.
Snauwen, mopperen, schelden en/of negatief zeuren, dat betiekent het ongeveer.
Vaste lezer Willem reageerde naor mij toe via de mail met de volgende opmarking:
“In mien praktijkjaor in 1963 ha’k te maken met den olde en veural wieze timmerman wel altied zee “Dree keer meten en ien keer zagen”.
Was veur mij een les wel veul wieder gung as allent maor dat stukkie holt ofzagen, maor universeel te gebruken.”
Willem betrekt dat ‘dree keer meten en ien keer zagen’ dus ok op oons taolgebruuk en oons gegraans.
Denk eerst eem nao veurda’j der van alles uutkraomt.
A’joe van te veuren bedenkt wat je woorden teweegbrengt bij een aander, dan ku’j joe soms maor beter stille holden.
Maor niet allent bij je woorden, ok met het kopen van dinge is het verstandig um dree keer te meten:
He’k het neudig?
Kan ik het betaolen?
Waor kan ik het kwiet?
Menigeen komp uut de IKEA met een karre met een kop d’r op, um tot de conclusie te kommen dat het niet in de auto past.
En ienmaol thuus is het ok altied maor weer ofwachten of ie alles kwiet kunt. En of het allemaole neudig was…..
Toen ik d’r over nao gung denken was d’r nog veul meer waorbij a’j beter dree keer meten kunt, beveurbeeld vekaansies boeken, je politieke stem uutbrengen, je gedrag as weggebruuker (meten scheelt boetes…) en eten en drinken.
Ie kunt zölf vast ok nog wel meer bedenken….
Bespiegelingen bij een blog.
Bedankt Willem!
Willem
Ok al wi’k zeker dat die betreffende timmerman, Jan Heeling, hij zat in 1963 al vlak veur zien pensioen en hef dit un dermaonse allang verlaoten, toch benk hum der dankbaor veur wat hij mij toen leerd hef. Al haj daor as ‘begunnende twintiger, niet altied oog veur.
Hoe zat het ok al weer met wiesheid en jaoren?