“Dunderdagmörgen um 10.00 uur; tot dan!”
Zo eindigde mailwisseling die ik haar met Henny, de coördinator van de schrievers die nou en dan een stukkie inlevert veur een column in de rubriek ‘Moi Noordenveld’. Gustermörgen zaten we bij mekaor op uutneudiging van Maria, uutgever van het streekblad ‘de Krant’: Tea Nijnuis, Henny Bouwman, Lammert Douwes, Bert Blaauw, Anne Doornbos en ik.
Zij kenden mekaar al, ik haar drie van de vief nog nooit ontmoet.
We mussen het over een paar dinge hebben.
‘Wat goa’we doen met Meertmaond Streektaolmaond?’ was ien van de vraogen.
Der weur ofspreuken dat der in de meertmaond iedere dag een Drents woord op de website van ‘de Krant’ stiet en dat der in de papieren kraante alle weken een overzicht komp van alle woorden die veurbijkommen bint.
Misschien komp der dan an ’t einde van de maond een ‘woord-van-de-maond’-verkiezing, maor dat hangt nog van een paar aandere dinge of.
Het was mooi um het mekaar over typisch Drentse woorden te hebben.
‘Kevot’ bijveurbeeld. Haar ik nog nooit van heurd. Het bliekt een Drents woord veur enveloppe/couvert te weden, dat in de Franse tied in Nederland in zwang raakte.
In het kader van ‘Veurlezen op de basisschoelen in Noordenveld’ vreug Tea of wij nog veurlezers wussen.
Iene wus ik der: ik heb mij opgeven as veurlezer op een basisschoele in Roden.
Maor wij hebt nog gien veurlezers genog!
Woon ie in de buurt en praot ie de streektaol? Geef joe dan op!
Kan bij mij via een reactie op dizze website.
Toen ik vreug wat der dan zoal veurlezen weur, bleek dat het Huus van de Taol boekies en programma’s anböd.
Ze hebt bijveurbeeld ok het programma ‘Wiesneus’; dat is een methode um speulenderwies Drents te leren.
Der heurt ok een website bij met liedties, verhaolen, gedichies en spellegies in ’t Drents. Alles is ok te beluusteren: zo kunt kinder op een laagdrempelige manier kennismaken met het Drents. In de Meertmaond Streektaolmaond geeft ze ok een tiedschrift uut under de naom ‘Wiesneus’ dat dan uutdield wordt op de schoelen in Drenthe. Beneid? Hierbij een link naor de website.
Mooi um mekaar zo ies te ontmoeten!
Wij blieft met mekaar de column ‘Moi Noordenveld’ verzörgen en wie wet komp der nog ies een podcast. Gister weur der opperd dat het misschien wel mooi zul weden wat woorden uut het Roons en uut het Westerkwartiers naost mekaor te zetten en ies te kieken hoe bepaolde woorden en klanken tot stand kommen bent. En hoe komp het eigenlijk dat Westerkwartiers volgens de Grunnegers van het Hogeland gien Grunnings is? En dat het Roons volgens de Zuud-Drenten ok gien Drents is?
Dat bracht mij te binnen dat de variant van het Stellingwerfs dat wij in Smilde preuten ok altied wat smadelijk wegzet weur as ‘dat gebrekkige Fries’.
Het bent allemaol mengvormen van de streektaol en de iene variant is echt niet meer weerd as de aandere.
Het belangriekste is dit:
Blief bij de tied, maor vervul oeze wèens:
Asjeblieft mensen, blief praoten in’t Drèents!
Sinet
Drents met een vleug(je) Rotterdams. Kan dat ook 😉
tea nijnuis
Mooi schreven Ada. Mooi overzichie waor wie het zoal over had hebben.
Willem
Um Jan Germs an te halen: “aj alle Drèents wat aans klinkt as je eigen Drèents ziet as gien echt Drèents dan hol ie maor een verrekt klein stukkie Drenthe over.”
Ik geef ’t metien toe; wij Bruntingers dreven ok de spot met de Smillegers over ’t waeter klettert tegen de glaezen’ en ‘daj met de bokkewaegen de Smilde of komt jaegen, dat zo daevert’. Maor toen ‘k in Beilen hen schoel gung waren het de Hiekers wel de spot dreven met het taolgebruuk van de Bruntingers en Börkers. Zij haarn der muite met daw beveurbeeld opa en opoe vrij kört afbiet. Veur heur klunk het as oppa en oppoe.
Maor um op ’t kevort weerum te kommen; mien opa gebruukte dat woord consequent, al har hij aid over een ‘koevort’. In de grote Kocks zag ik dat daor as eerste stund ‘komvort’ en hij nuumde kevort, kovort, konvort, koevort, koevert en kovert as aandere namen wel in Drenthe gebruukt weurn. Ie zult haost zeggen net zoeveul namen as dat der soorten enveloppen bent.
Ben wal beneid hoelang of der met het gebruuk van elektronische post, ’t koevort nog blef bestaon.