Al ies eerder schreef ik over de podcast ‘De Nedersaksen’.
He’j dat toen niet metkregen? Hierbij een link naor dat blog uut 2021.
Het mooie van een podcast is, da’j trugge kunt luustern; ik haar naomelijk hielemaol niet metkregen dat der al weer wat neie ofleverings waren die ik nog niet beluusterd had.
Vandage, op fietse hen Grunn’n, luusterde ik naor oflevering 25 uut november 2023.
Die oflevering was live opnummen in Raolte in de Plaskerk ter gelegenheid van het 900-jarig bestaon van Raolte.
Te gast waren een amateur archeoloog en een echte archeoloog en het was warkelijk een ontzettend interessant gesprek over de geschiedenis van dat gedielte van Nederland.
Gerard Oosterlaar was ok te gast; dat zeg joe misschien zo niks, maor dat is ien van de leden van Höllenboer, de band die ooit ‘Busje komt zo’ zung. Ken ie vast wal.
Dat die band niet allennig van die onzinmuziek uutbrengt bleek uut het liedtie dat op verzuuk van Gerard draaid weur.
Het was een vassie over vrijwilligers, over hoe dat giet op een dörp a’j allemaole de scholders der under zet as der wat gebeuren möt.
Clubgebouw bouwen bijveurbeeld veur de voetbalclub.
Het lied het ‘Veur oons’ met as subtitel: Niet veur mij, niet veur oe, maor veur oons.’
Luuster maor ies; veur oons.
A’j uut een klein dörp komt, komp het je vast bekend veur: de trommel vol stoete, een liedtie van Skik op Radio Oost en Annie en Mans die gebak komt brengen.
De wonderlijke mengeling van harde warkers: schoelmister, huisarts, Anton en Riek, zomaor vrijwillig, iederiene is geliek en natuurlijk: de slager die halverwege de middag warme gehaktballegies komt brengen.
Niet veur mij, niet veur oe, maor veur oons: het plattelandsbegrip ‘naoberschap’ hiel mooi weergeven in een lied.
Beneid naor de podcast?
As bonus bij mien blog vandage een link naor de website van ‘de Nedersaksen‘.
Willem
Aj geboren en opgruid bent op ’t plattelaand hej gien enkele muite met de geest van ’t liedtie van Höllenboer “veur oons”, lek mij zo toe. Eigenlijk was het ien en al herkenning; ben ja0ok groot worden in zo’n zölfde cultuur. Ik mark dat an mien vrouw; zij is geboren en opgruid in Arnhem en hef daor tot an 1973 ok woont. En ondanks dat ze van klein kind of an alle vekaansies op een boerderij in de Achterhoek deurbracht hef, is ze wal altied een stadse bleven. Dat mark ik umdat ik meer richt ben op ‘wij’ en zij van huus oet veul meer op ‘ik’, al is heur aord niet egoïstisch. Dat is veur mij een stads, misschien wal een Arnhems trekkie, want toen ik in 1966 in Arnhem gung warken markte ik dat bij de geboren Arnhemmers dat veul meer op dan bij de import-Arnhemmers. En in mien diensttied was het mij ok al opvallen dat stedelingen meer op ‘ik’ gericht waren dan plattelanders. Nou kwamen in de stee waoras ik het grootste diel van mien diensttied deurbracht heb, vrijwel alle plattelanders oet het Nedersaksische taolgebied, met Twente en de Achterhoek as grootste ‘leveranciers’ en Drenthe en Grunning as een goeie tweede.
Dat liedtie van Höllenboer van “Busje komt zo” is toch zeker 35 jaor leden liekt mij toe. Ik har op het toppunt van de populariteit een grote funderingsklus en daor zat ok hiel veur speciaal heiwark bij. Die heiers dreiden dat liedtie wal 10 keer op een dag en aans zungen ze ’t wal. Al vun’k ’t best een lollig liedtie, ik kreeg der wal schoon zat van en vluchtte zo nou en dan de keet even in.
Veur die heiers har het wal as veurdiel dat da’k koffie veur ze zette (wa’k zölf hielemaol niet lust), maor dan wo’k dat liedtie even niet heuren. Was een goeie ofspraak, want kennelijk zette ik koffie wel goed te drinken was (deink ik dan maor bij mezölf)