12 mei: De bovenkaante.

Sinds de introductie van de neie layout van dizze website  (zie ‘Een nieuwe look‘) zöt de bovenkaante van de pagina d’r niet meer aal hetzölfde uut.
Die bovenste balk wordt ‘header’ nuumt en daor kan ik zo nou en dan een aandere foto in uploaden.
A’j regelmaotig in dit on-line tiedschrift leest, dan valt je dat misschien hielemaole niet op, maar veur mij is het sport um ‘bij de tied’ te blieven.
Letterlijk en figuurlijk bedoel ik dat.

Uutgangspunt veur de foto die de header siert is oonze tuun en op iedere foto stiet in ieder geval de zunnewiezer.
Ie hebt al foto’s veurbij zien kommen van de harfst, de winter en van de lente.
Sums zie’j de linkerkaante van de tuun met de fruitbomen en de lavendel, sums zie’j de rechterkaante met de Koreaanse Zulverspar, de hortensia’s en Gradus van de Lansbulten.
Guster maakte ik een neie foto. Dat ha’k twee dagen eerder ok al daon, maor toen was Gerard het d’r niet met iens.
“He’j dat bruune blad in de hegge d’r bij op en dat grote, gruune watervat……”
Gerard is trots op zien tuun, dus het komt wel krek.
Hij haar ok geliek.

Veurjaor in oonze tuun dus!
Bluiende appelbomen en rooie tulpies.
He’j die veurige seizoensfoto’s hielemoale mist?
Veur de liefhebber hierbij een kleine selectie; a’j op de foto klikt kriej een vergroting.

De harfstkleuren in oktober.

Het verval in november.

De lochies in december

De bevreuren zunnewiezer in jannewaori.

De sneiklokkies in febrewaori.

De narcissen in april

Die van mei van dit jaor zie’j dus nou an de bovenkaante van dizze website.
Op naor de zummer!