Dunderdag veul de neie ‘Zinnig‘ op de matte.
Het thema woar as wij dizze keer teksten over an können leveren was: Positief (over het) platteland.
Het platteland (of laandelijk gebied) stiet veur al het gebied buuten de bebouwde kom.
En ok al woon ik niet op het platteland, ik kön bij dat underwarp wel een verhaol schrieven.
Het het ‘Accent-discriminatie’ en a’j vaste lezer bint van dit blog dat he’j de essentie van dit stuk wel ies veurbij zien kommen.
Bi’j beneid naor de tekst van mien bijdrage? Hierbij een link naar een PDF: Zinnig – Accent-discriminatie
Veurige weke heb ik wat teksten uutzöcht veur een volgende activiteit op streektaolgebied: ik bin uutneudigd deur de organisatie van Taol an tafel (Huus van de Taol) um wat veur te lezen op
zundag 26 febrewaori in Noord Slien. Dat he’k ien keer eerder daon, toen was het een bijienkomst under diezölfde naom in Dwingel*.
Wat ik begreep van de leiding da’j in Dwingel en Slien niet dezölfde teksten kunt gebruuken, umdat d’r mangs wat overlap zit in ’t publiek.
Nou heb ik genog teksten op dizze website staon die onder het underdiel ‘Proza’ veurlezen kunt worden, maor dan moet der nog wel hier en daor wat anpast worden.
Een stuk in het Nederlaands möt eerst vertaold worden en ik kan niet gemakkelijk verwiezen naor een veurig blog of een aandere website, dus ik moet wat meer uutleggen.
Gerard is dan altied mien proefknien.
As ik de verhaolen uutzöcht heb lees ik ze an hum veur.
Hij is een goeie graodmeter: as hij het onderholdend en/of komisch vindt, dan zit het wel goed.
Hij durft het ok rustig te zeggen as ’t niks is: toen ik eind dit jaor het karstverhaol much schrieven veur ‘De Krant’ keurde hij het eerste verhaol falikant of.
Wij kwamen veur 26 febrewaori uut op een mooie mix van körte verhaolen over een wandelvierdaagse, wachtkamers in de gezondheidszorg, een breedsprakige wasmachinemonteur, de Rodermarktparade en een verhaol over eier zuuken.
Nou bin ik regelmaotig an ’t oefenen.
Langzaom praoten en niet ‘revelen’.
Klemtonen goed leggen, hoge en lege stemmen accentueren.
’t Komp vast wel goed, maor ik bin altied wel wat nerveus veur zuks.
Wo’j ok kommen kieken en luusteren?
Via dizze link ku’j je opgeven.
* Meer lezen over die Taol an tafel in Dwingel? Klik dan hier: ‘Proza in Dwingel’
Willem
Op de webstee van ’t Huus van de Taol zie regelmaotig wat staon over Taol an Taofel en ak wat dichterbij woonde dan was ik der ok wal een keer hengaon. Maor um veur dag en dauw op zundagmörgen op te staon (ik ben pensioneerd en altied al een nachtmèens west) um um 11 uur in Noord-Slien te weden is mij ok haost gek genog.
Dat verhaal over accentdiscriminatie is wal herkenbaar; op de legere school he’k een mister had wel vund daw, ok in ’t speulkwartier, ‘Hollands’ proten mussen en as hij pleinwacht har dan lette hij der ok op. Wij, allemaol geboren en opgruit in Drenthe en overal en altied Drèents prootten mussen opiens een aander dialect gaon proten van hum. Gelukkig hef hij zien collega-underwiezers niet met dat virus ansteuken, dus op ’t lest hef hij die strijd wal verleuren.
Toen’k op mien 22e in Arnhem kwam te warken kreeg ik der ok met te maken; miestal niet deur de Arnhemmers zölf, maor deur aandern wel vaak argens oet’ westen kwamen. In ’t begun trök ik mij der nog wat van an, maor op ienig mement woj der vrij mieterig van in de hoed en toen ‘k een keer bij een slager wat bestelde kwam opiens oet de rij wachtende, met een zeer Haags accent, de opmarking die misschien hielemaol niet kwaod bedoeld was, maar mij op dat mement net even teveul was “U komt uit Friesland”. Het was niet de eerste keer dat ze mij oetmaakten veur een Fries (kennelijk he’k een beetie Frieze tongval, want ok geboren Friezen begunden soms Fries tegen mij te proten), maor wat was het op ien of aandere menier een opluchting/bevrijding veur mij da’k heur antwoordde: “Nee, maar u komt uit Den Haag”, en gung deur um de bestelling te betalen. Har gien enkele behuufte meer um mij te verdedigen of oet te leggen da’k echt oet Drenthe kwam.
Het ienige waora’k nog altied op reageer is, as ze mij een Hollander nuumt. Zo wi’k, ok nou ‘k al aordig richting 80 gao, nog aal niet nuumt worden.