Netuurlijk ben ik niet de ienige die wel ies wat in het Drents schref; lees maor ies een ‘Zinnig’.
Vandage schrief ik over een collega-schriever: Freerk Wiechers.
Hij is de vader van mien schoonzus Ali en a’j al een poossie met mij metleest he’j al wel ies een verhaol van zien haand lezen.
Hij was namelijk ‘Lezer van de maond in juli 2020. Klik hier veur zien bijdrage destieds.
Freerk schref in zien eigen variant van het Nedersaksisch, het Drents dat praot wordt in Dwingel en omstreken; hij woont in Eemster.
In 2016 schreef ik een blog over de innige vriendschap van oonze dochter Carlijn en Rick, zeun van Roelof en Ali.
Daorin linkte ik naor het verhaal van hum dat ‘Filistijnen’. hiette; daorin schref e over zien kleinzeunen die een nichie (oonze Carlijn dus) op bezuuk kregen. Beneid naor wat Freerk toen schreef? Hierbij een link naor dat blog.

Ofgelopen zomer kreeg ik van Ali een puute met tiedschriften (Royalty, Vorsten etc.) en daor zat ok een boek in. De titel van het boek was ‘Dreints tableau’ en het was schreven deur Freerk Wiechers. Hij haar het in eigen beheer laoten drukken en ik kreeg een exemplaar; daor was ik wies met. In zien veurwoord schref e:  

De titel van dit boek vrag meugelijk enige toelichting.
Op de foto van de omslag stao ik onmiskenbaor ofbeeld as jager.
Nao een jachtdag wordt het bemachtigde wild met respect uutlegd, zodat men nog eem kan naogenieten van de kansen die beuden bint en vake benut. Daorna wordt het wild verdield under de jagers. Dit ritueel wordt ‘het tableau uutleggen’ nuumd.
Ik heb de ofgelopen jaoren artikelties schreven, als het ware ‘scheuten’ veur de buurtkraante ‘Eemshoorn’ en ‘het Drents Jagersblad’. Het leek mij mooi um in de stijl van de jacht dizze bundeling het ‘uutleggen van het tableau’ te nuumen.

Freerk.

Het bint mooie verhaolen.
En ok verhaolen over de jacht, een underwarp waor as ik nou nooit over schrief!
A’j de schriever kent, dan heur ie hum praoten in zien mooie Dwingeler streektaol.
Um een idee te kriegen van wat der zoal in het boek stiet, heb ik der ien verhaol uutlicht.
“Uut de tied’ stiet der boven.

A’j de ofbeeldings klikt dan komt ze groot in beeld; dan ku’j het verhaol goed lezen.