In de zummer kreeg ik een mail van Henny Bouwman, dichteres uit Norg.
Zij coördineert de publicaties van de teksten die wordt anleverd veur de rubriek ‘Moi Noordenveld’ in ‘de Krant’.
Zij vreug mij of ik dit jaor het karstverhaal zol willen schrieven.
“Wordt publiceerd in week 51; ze wilt het graag hebben veur half november. De limiet is 2000 woorden, dus leef je uut”.
Wat een mooie opdracht!
Naor aanleiding van dat karstverhaol weur ik deur Fiona Huisman, journaliste van ‘de Krant’, uutneudigd veur een interview in de rubriek ‘Kleintje Cultuur’ in dat regioblad.
Dunderdagmiddag 15 december kwam ze een kop thee drinken en hadden wij een fijn gesprek.
Fiona is tekstschriever van beroep en hef in die hoedanigheid een mooie website, kiek maor ies op fionahuisman.nl.
A’j klikt op het tabblad ‘Columns’ lees ie mooie verhaolen van heur haand; ik heb heur uutneudigd om ies een gastblog te verzörgen op ‘de Waarde van de dag’. Nou ik heur columns lezen heb verheug ik mij d’r op!
Mien karstverhaol en het interview bint vandaag publiceerd.
Nou publiceer ik alle dagen een blog, maor toch haar ik vanmörgen ‘kloeten in de boek’; ik was een beetie zenewachtig, zeg maor.
Het is schreven in het Drents dat ik zölf praot en het giet over een klein zulveren vogeltie in een karstboom.
Woon ie niet in de buurt en wo’j je het verhaol toch graag lezen?
Hierbij een link naar het PDF Pechveugeltie.
Van het interview heb ik een PDF maakt; a’j hier klikt ku’j dat ok nog lezen.
Wo’j graag een melding as der een nei blog publiceerd wordt?
Installeer dan de RSS-feed app op joen telefoon of tablet.
Hier lees ie hoe dat möt.
Willem
Moi Ada, met interesse he’k het interview lezen en ik ben het met ien ding glad oniens met je; der bestiet gien officieel Drents, maor der is wal een officiële Drentse spelling. Al in 1987 is die spelling autoriseert deur de Drentse Staten . Die spelling gef veul ruumte veur de verschillende varianten wel het Drèents kent. Oj nou waoter, water, waeter, of wotter zegt; ’t is allemaol goed schreven in de Drentse spelling en der wordt allemaol ’t zölfde met bedoeld; water. Net as ie, je, joe, het wordt allemaol veur ’t zölfde gebruukt en ok allemaol Drèents.
Dus, gien officiële Drentse taol, maor wal een officiële Drentse spelling.
Bij ’t Huus van de Taol hebt ze vast en zeker nog wal een spellingsboekie veur je en aans kuj op heur webstee ok aordig wiezer worden.