Bij de ‘Activiteitenmarkt’ van oonze PKN-gemiente zaten wij in Den Bosch met de Bossche bollen van Jan de Groot en de mega-borrelplank.
Maor wij waren der toch een beetie bij, want ik beud twee activiteiten an waor as meinsen zöch veur können inschrieven.
Ién daorvan was ‘Een uurtie Drents’; zu’n markt vin ik een mooie gelegenheid um het Drents  positief under de aandacht te brengen.
Gustermidddag zaten de deelnemers bij mij um de taovel in oonze woonkeuken; veurnamelijk Roners, maor ik haar waorömpel ok een gast uut Hieken! Ze haaren allemaol € 5,-  betaold veur het goeie doel, namelijk het wark van Father Petru in het dorp Ulmu in Moldavië.

Dat uurtie is zo invuld.
In de loop van de jaoren heb ik al mooi wat Drentse verhaolen verzaomeld en verder moet de anwezigen ok zölf an ’t wark.
Netuurlijk vertel ik op zu’n middag ok over ‘mien held’ Daniël Lohues en laot ik een liedtie van hum heuren: ‘Denk dat ik toch maor nie kom’.
Daor vertel ik dan bij wat ik daor ooit al ies over in dit blog schreef in 2016 over die pleister die der te langzoam of giet.
Ok vertelde ik het verhaal over oonze onvolprezen conciërge Schuttrups op de MAVO in Smilde en over Willem die in het Martiniziekenhuus tegenover mij lag. Ién van de gasten haar dat verhaol ooit uutknipt uut de Krant waor het toen in stun en kende het nog!

Veur het interactieve gedielte haar ik een vieftal Drentse spreekwoorden uutzöcht, bijveurbeeld het spreekwoord over de motte uut de titel van dit blog. Verder vreug ik of ze wel wussen wat een hakkenkruk was? En een kniepstuuver? En een koenavvel? *

We sleuten de middag of met het samen zingen van het neie Drentse volklied dat Anne Doornbos maakt hef.
Dat hef e schreven op de olde melodie, dus iederiene kön het zo metzingen.
Wo’j ’t ok eem zingen?
Hierbij een link naor het PDF met de tekst: 2024.05.30 Nei Drèents volkslied

En natuurlijk reup ik wat ik altied al zeg: het is slim belangriek dat wij het Nedersaksisch met mekaar te blieft praoten; Grunnigers, Twenten, Achterhoekers, het mak niet uut, ie kunt mekaar goed verstaon, het klinkt allent wat aans.
Beneid naor het veurige ‘Uurtie Drents’?
Hierbij een link naor het blog dat ik daor toen over schreef: Krooje? Spetterkeersie?

* Een motte is een vrouwelijk varken. A’j ’t zo drok hebt as een motte met ien bigge, dan doe’j allent maor drok en he’j in feite niks te doen.
Een hakkenkruk is een stuntelaar, een kniepstuuver is een gierigaard en een koenavvel is een stommerik, deur Gerard ook wel ‘dogge’ nuumd.

Denk ie nou bij dit verhaol: ik wol bij oons ok wal ies zu’n Uurtie Drents organiseren?
Dat kan! A’j niet  bij mien sociale contacten heurt, dan ku’j altied een reactie sturen via de knop ‘reageren’ under an elk blog.
Ie moet dan de getallen die daor staot in het vakkie daorunder typen. (dat is um te veurkommen dat ik spam krieg van robots….)
Veurbield: 2, vier een een 6 , dan moe’n typen 2 4 1 1 6.
In het vak daorunder schrief ie dan joen reactie en as ’t klaor is druk ie op ‘reactie plaatsen’
Joen reactie komp binnen via mien email. Die publiceer ik dan niet bij de reacties in de rechterkantlijn, maor dan neem ik via de mail contact met joe op.