Gustermorgen stun de wekker op half 9, maor wij gungen niet hen de karke; ik was uutneudigd veur het underdiel Proza bij ‘Taal an taofel’ in Noord Slien.
Dat bint bijienkomsten, organiseerd deur het Huus van de Taol, op een zundag tussen 11.00 en 14.00 uur; ie kunt dan luusteren naor schrievers en muzikanten in de streektaal.
Mooie jurk an, tasse met teksten met: op naor Slien.
Der bint naost Proza nog twee aandere underdielen: in de categorie Poëzie können wij luusteren naor Marchienus Elting uut Odoorn en Martije Lubbers verzörgde samen met pianist Tony Hoiting het underdiel Meziek.
Het was een mooi en afwisselend programma; Gerard en ik hebt der van geneuten!
Marchienus hef al wat priezen wunnen met zien gedichten en Martijje is in Drenthe een hiel bekende zangeres: zij speulde bijveurbield de hoofdrol in de musical ‘De Vlinderprinses’.
Ik doe dizze beide kunstenaars te kört as ik dat allemaol in dit blog van maximaal 500 woorden moet proppen, dus zij kriegt binnenkört allebei een eigen blog. Eem geduld dus nog.
Op zu’n mörgen mag ik twee keer een kwartier vullen, dat betiekent 6 à 7 verhaolties.
Wat lees ik dan veur?
Eerst kiek ik dan wat ik al eerder veurlezen heb. Ik was namelijk al ies in Slien in 2023 en ok al ies in Dwingel in 2021.
Het biezundere van veurlezen veur publiek is da’j reacties truggekriegt van uut de zaol.
Mensen grinnikt um mien belevenissen, vult sums al wat an en wat ik in de zaal zie is een andachtig publiek dat ontspannen genöt en soms zölfs hardop lacht. A’j gewend bint um allent op papier te publiceren dan is zu’n dankbaor publiek beslist een fijne ervaoring.
Wat vertelde ik dan?
Over oons bezuuk an de femilie in Canada en hoe wij daor half Drents half Engels preuten: Slordig Nederlands.
Over de sjoelcompetitie bij oons in ’t gezin en over de plaaties-spaarderij bij een Jumbo-actie: Wat n oetgezuik!
Over Drents taolgebruuk, over een doeve die Onan hiette en over sanitair in de jaren’60.
Wat ik nao afloop truggekreeg van de toeheurders was dat het allemaole zo herkenbaor was.
In de opsomming hierboven mist het verhaal over mien strapatzen in combinatie met het programma ‘Nederland in beweging’.
Dat verhaol haar ik instuurd naor de redactie van de Zinnig veur het april nummer; het thema daorvan was ‘Lachen’, maor de neie Zinnig is nog niet uut, dus dat hol ik nog eem under de pette: ok daor komp nog een apart blog over.
Het was ronduut gezellig in Noord Slien.
Wij kwamen nog een bekende tegen, want old-koster Ab zat ok in de zaal; ie praot dan ok zo weer wieder.
Verder was der een mevrouw die alle dagen mien blog les; die kwam eem kennismaken en vertelde dat ze alle dagen rond 7 uur ’s aomnds even les wat ik die dag weer heb beleefd.
Zo leuk; nao tien joar bloggen heb ik een ‘waarde-van-de-dag’-community* opbouwd.
Nou nog een mooi Drents woord veur community!
Wie hef een veurstel?
*Een community is een groep meinsen met gedielde interesses, waarden of doelen.
Het gef een gevuul van argens bij heuren, böd onderlinge steun en kan opbouwd worden rondom marken, hobby’s of organisatie.
Petra1945
Ik ken geen ander lid van “de community” maar net als die mevrouw klik ik elke avond rond 7 uur een drietal items aan, waaronder de WvdD. De meeste andere weblogs die ik volg bekijk ik ’s ochtend bij het ontbijt… maar jou zie ik eerder! En als het onderwerp linkt met het interessegebied van een vriend of kennis, stuur ik hem door.