Dizze weke is het week van de jaoren ’80 op Radio 5.
Ik heur joe denken: “Wat hef dat nou met Drents te maken?”
Het antwoord is ‘Bert Haandrikman’.
Hij hef zien eigen ochtendshow op 5 van 06.00 – 09.00 uur en ik ben een vaste luusteraar.
Hij stek niet under stoelen of banken dat e uut Börger komp en drag uut dat e een trotse Drent is.
Bert was as puber al een verwoed radioliefhebber en deur an alle spellegies met.
Curry & Van Inkel, Frits Spits, Hans Schiffers: hij hung regelmaotig an de tillefoon en sprokkelde zo hiel wat priezen bij mekaar.
In ‘Goeiedag Haandrikman’ heurden wij de ofgelopen dagen aal stukkies van die tillefoongesprekkies veurbij kommen.
Ién van de redens waorum hij met an deur met die spellegies was, dat e zölf op de radio wol kommen.
Hij wol stommegraag discjockey worden en dat vertelde hij ok regelmaotig as e weer ies op de radio kwam.
Wat opveul in die gesprekken was dat Haandrikman een Drents accent haar; ie können duudelijk heuren dat e uut Börger kwam.
A’j hum nou heurt praoten heur ie daor niks meer van.
Vanmorgen was der een luusteraar die reageerde op dat accent: “Hoe heb je dat zo afgeleerd?”
Toen vertelde hij dat dat veur hum destieds best een probleem west was.
In zien umgeving weur hum veurholden dat hij met zien Drentse ofkomst hielemaol gien diskjockey kun worden, want gieniene in Nederland zat te wachten op ‘een Drents jongetje uit Borger’.
Maor hij leut zich niet ontmoedigen.
Hij vertelde dat e zich suf oefend haar en toerloos Fred Emmer ofluusterde en naopreut.
Bert Haandrikman (foto: website Radio 5)
Het was een lange weg, maor Bert Haandrikman is een bekende diskjockey worden.
Vanaf 2002 was hij jaorenlang te heuren bij de KRO/NCRV op Radio 2. Hij was 14 keer medepresentator van de Top 2000 en tenslotte volgde hij Jeroen van Inkel op op Radio 5.
Respect en bewondering veur dizze Drentse deurzetter.
Dat e in de radiowereld, die een afkeer hef van regionale accenten, toch deurdrungen is tot de top.
Hij prat nog Drents met zien olders en as e in Börger is, maor hij zee dat e de streektaol haost wat verleerd was.
Kiek, daor snap ik dan weer niks van! Een Drents jonchie verleert zien moedertaol toch niet?
Ok eem genieten van die oale stukkies Radio?
Op het Instragram-account van Haandrikman vin ie 2 fragmenten: op 23 mei het programma van Curry & Van Inkel en 24 mei met Hans Schiffers.
Sinet
Ik heb er ook erg van genoten. Zo grappig.
Willem
Tja, ik kan mij der ok niks bij veurstellen daj je moerstaol vergeet. Wa’k mij wal veurstellen kan is daj een woordtie niet metien paraat hebt aj ’t lange tied niet meer proot hebt.
Ak mijzölf naogao; in 1964 ben’k vortgaon oet Drenthe en van mien 7 breurs en zussen is der maor ien altied in Drenthe blieven wonen. De rest woonde overal ter wereld, tot an Australie toe. Wij bent allemaol trouwd met niet-Drenten, maor de femilietaol is altied Drèents bleven en dat angetrouwde spul mus het maor leren verstaon. Aans haarn ze dikke pech.
Wa’k nog wal een aordig ding vund was dat in de jaoren ’80 ik samen met mien oldste breur, degene was wel het dichtsbij woonde bij mien pappe, en nou biw met zien beidende genen wel ’t wiedst vort woont van Börk. Al mien aandere breurs en zussen bent in de loop van de tied weerum gaon hen Drenthe, of woont kört bij Drenthe, net bij Coevern over de grèens; Emmelkamp zoas ze het daor zölf nuumt.