Categorie: Muziek Pagina 3 van 39

Daniël Lohues was begun december te gast bij Bar Laat.
Dat was veur de promotie van zien neie tour met Holland Baroque onder de titel ‘Advent’. En wij hadden al kaorten!
Dat kwam van mien breur die nao de zommer al appte “Wo’j hier ok weer hen?”
Jazeker! In 2019 was ik naomelijk ok al bij een soortgelieke veurstelling west met Henk en Henk Lucas (een kammeraod) en mien schoonzussie Ali. Daarover schreef ik destieds het blog ‘De Drent Lohues en Holland Baroque‘.

Gusteraomnd zaten wij weer met ’n vieren in de Neie Kolk in Assen, maor dizze keer was Gerard met, Ali was helaas verhinderd.

Foto: website Daniel Lohues

Bij de ingang stun een meneer die oons ‘Goedenavond en een fijne voorstelling’ wenste.
Die begroette ik met ‘Moi!”
“Hé, dat is weer eens wat anders”.
In de heufdstad van Drenthe. Daor heurt ‘moi’ toch gewoon te weden?
Dat weur maor weer ies bevestigd deur de maestro zölf die achter het kistorgel gung zitten en zee ‘ Moi!”

Het was met recht een ‘Advents’-veurstelling’.
An ’t begun heurden wij een Prelude van Bach, bewarkt deur de zussen Steenbrink waor allemaol bekende kerstmelodigies in deurklunken.
Toen ze daorna het eerste lied ‘Tik Tak’ uutvoerden besleug mij de brille al van de emoties en dat gebeurde  gusteraomnd nog een paar keer.
Mooi was hoe de klassieke muziek soms overgung in een nummer van Lohues: het orkest begunde bijveurbeeld met de melodie van lied “Ik ben een engel van de Heer’ (Vom Himmel hoch), dat naadloos overgung in ‘Van lege naor hoge’.

En net as in een ‘gewone’ show geneuten wij nou ok weer van de prachtige verhaolen van Lohues bij de liederen. Hij vertelde over het eerste stuk van het Weihnachtsoratorium van Bach. “Jauchzet, Frohlocket! Auf, preiset die Tage!  Typisch Drents is dat wij nao ‘Prijs de dag’ altied geliek ‘niet’ zegt.  ‘Pries de dag niet veur het oamnd is.’
Volgens Lohues was het maor goed dat Jezus niet in de velden van Klazienaveen geboren is. Drentse herder waren vast niet gaon kieken in een stal in het Bargerveen. ‘Eerst maor ies eem anzien….”
De Nedersaksische legerleider Widukind kwam nog veurbij en wij heurden een spiksplinternei ‘gloria-kerstlied’.

Dit blog schöt tekört as het giet um de beschrieving van hoe mooi het was.
Het was ontroerend, een streling veur het oor en balsem veur de ziel.
Wát een mooi begun van de kerstweek.

Naoschrift: noa de veurstelling vreug ik de mannen die met waren wat ze der van vunnen.
Unaniem vunnen ze het een geweldige veurstelling.
Henk Lucas, die ok hen alle andere veurstellings van Lohues west is benaodrukte hoe aans de meziek van Lohues klinkt met dit orkest.
Veur breur Henk voegde de uutvoering van ‘Op fietse’ niet veul toe: “Dat nummer heb ik nou vake genog veurbij heuren kommen.”
Gerard was raakt deur het verhaal over de herinnerings van Lohues an kerstaomnd in zien jeugd.

Helaas: ok van dizze toer gien CD. Um een idee te kriegen van wat wij gusteraomnd zagen hierbij een link naor de uutvoering van ‘As de liefde maor blef winnen. 

Al ies eerder schreef ik over de podcast ‘De Nedersaksen’.
He’j dat toen niet metkregen? Hierbij een link naor dat blog uut 2021.
Het mooie van een podcast is, da’j trugge kunt luustern; ik haar naomelijk hielemaol niet metkregen dat der al weer wat neie ofleverings waren die ik nog niet beluusterd had.
Vandage, op fietse hen Grunn’n, luusterde ik naor oflevering 25 uut november 2023.
Die oflevering was live opnummen in Raolte in de Plaskerk ter gelegenheid van het 900-jarig bestaon van Raolte.
Te gast waren een amateur archeoloog en een echte archeoloog en het was warkelijk een ontzettend interessant gesprek over de geschiedenis van dat gedielte van Nederland.

Gerard Oosterlaar was ok te gast; dat zeg joe misschien zo niks, maor dat is ien van de leden van Höllenboer, de band die ooit ‘Busje komt zo’ zung. Ken ie vast wal.
Dat die band niet allennig van die onzinmuziek uutbrengt bleek uut het liedtie dat op verzuuk van Gerard draaid weur.

Het was een vassie over vrijwilligers, over hoe dat giet op een dörp a’j allemaole de scholders der under zet as der wat gebeuren möt.
Clubgebouw bouwen bijveurbeeld veur de voetbalclub.
Het lied het ‘Veur oons’ met as subtitel: Niet veur mij, niet veur oe, maor veur oons.’
Luuster maor ies; veur oons.
A’j uut een klein dörp komt, komp het je vast bekend veur: de trommel vol stoete, een liedtie van Skik op Radio Oost en Annie en Mans die gebak komt brengen.
De wonderlijke mengeling van harde warkers:  schoelmister, huisarts, Anton en Riek, zomaor vrijwillig, iederiene is geliek en natuurlijk: de slager die halverwege de middag warme gehaktballegies komt brengen.

Niet veur mij, niet veur oe, maor veur oons: het plattelandsbegrip ‘naoberschap’ hiel mooi weergeven in een lied.

Beneid naor de podcast?
As bonus bij mien blog vandage een link naor de website van ‘de Nedersaksen‘.

Op een zundagmiddag zat ik te kaorten maoken an de keukentaovel; via Spotify luusterde ik naor mien ofspeulliest ‘Auf Deutsch, bitte’, een liest met 23 duutse vassies waor as ik bliede van word. Het ofspeulen van die liest duurt ongeveer 75 minuten.
Toen het leste liedtie west was bedacht Spotify op basis van mien luustergedrag/het algoritme wat ik nog meer mooi zul vinnen.
Nao twee liedties dacht ik : ”Nee meneer Spotify, dit dus niet”  en leup naor de computer um wat aans op te zuuken.
En toen begunde der net een hiel mooi liedtie; niet in gewoon duuts, maor in het platduuts, een vorm van het Nedersaksisch wat wij ok praot, maor dan uut Noord Duutslaand.
Lale Andersen zung het: ”’Dat du mien Leevsten büst…’ uut 1961.

Mooi ja.
En a’j Drents of Grunnings praot ku’j ’t ok gewoon volgen.
Ok eem luusteren?
Hierbij een link naor een versie op YouTube.
Dit zingt ze:

1. Dat du min Leevsten büst, dat du woll weeßt.
Kumm bi de Nacht, kumm bi de Nacht, segg wo du heeßt;
kumm bi de Nacht, kumm bi de Nacht, segg wo du heeßt.

2. Kumm du üm Middernacht, kumm du Klock een!
Vader slöpt, Moder slöpt, ick slap aleen;
Vader slöpt, Moder slöpt, ick slap aleen.

3. Klopp an de Kammerdör, druk an de Klink!
Vader slöpt, Moder meent, dat deit de Wind;
Vader slöpt, Moder meent, dat deit de Wind.

Dan vraog ik mij geliek of: waor komp zu’n liedtie dan vot?
Dit vun ik der over op internet:

‘Dat du mien Leevsten büst’ is een plattdüütsch Volkslied, dat binnen en buten  Niedersachsen aordig bekend is.
Het vassie vertelt het verhaal van een wicht, dat de nacht in heur kamer met een jongkerel deurbrengt, zunder dat heur va en moe daor wat van wit.
De melodie komp al uut 1778 uut; in het liedboek ”Dor bin ick to Hus kompt het veur het eerst veur.
De oorsprong van het lied lig in de tweede helft van de 18e eeuw, waor het zungen weur as ‘Daß du mein Schätzgen bist“.
Het is veur het eerst publiceerd deur Karl Müllenhoff; hij nam het in  1845 op in zien bundel ‘Sagen, Märchen und Lieder der Herzogthümer Schleswig, Holstein und Lauenburg’, maor het is waorschienlijk dat de tekst nog older is. Wie het schreven hef is onbekend.

De mieste versies hebt maor drie coupletten, dat bint de strofen die hier boven staot.
Wat in de nacht gebeurt wordt an het veurstellingvermogen overlaoten.
In het boekie Hamburger Jugendlieder uut 1925 deuken nog twee coupletten op; die zollen schreven wezen deur de Holsteiner schriever Iven Kruse.
In die coupletten giet het al over de aandere mörgen: .

4. Kummt denn de Morgenstund, kreiht de ol Hahn.
Leevster min Leevster min, denn mößt du gahn!
Leevster min Leevster min, denn mößt du gahn!

5. Sachen den Gang henlank, lies mit de Klink!
Vader meent, Moder meent, dat deit de Wind;
Vader meent, Moder meent, dat deit de Wind

Dit blog draog ik op an ‘mien Leevsten”.